नेकपा एमालेको बुधबार बसेको दशौं महाधिवेशन आयोजक कमिटीको बैठकले कमिटि भंग गरी केन्द्रीय कमिटि बैठक बोलाएपछि त्यसको तयारी स्वरुप बरिष्ठ नेता माधव कुमार नेपालले छलफल थाल्नुभएको छ ।
असरा १८ गते बोलाइएको उक्त बैठकमा जाने या नजानेबारे निर्णय गर्न उहाँले परामर्श थाल्नुभएको हो । बैठकमा भाग लिने कि नलिने भन्ने सन्दर्भमा सामुहिक धारणा तय गर्न नेताहरू अनौपचारिक छलफलमा जुटेका छन् ।
बुधवार सम्पन्न महाधिवेशन आयोजक कमिटीले सर्वोच्च अदालतको आदेश र माधव समूहको माग बमोजिम २०७५ जेठ २ कै केन्द्रीय कमिटी र त्यसपछि एकतामा समाहित भएका नेताहरूसहितको बैठक बोलाउने निर्णय गरेको छ ।
अबको बैठकमा नवौं महाधिवेशनबाट निर्वाचित पदाधिकारीकै हैसियतमा माधव नेपाल पक्षका नेताहरुलाई सहभागी हुन आह्वान गरिएको छ । महाधिवेशन आयोजक कमिटी भंग भएसँगै नेपालसहित ११ जना विघटित प्रतिनिधिसभा सदस्यहरुमाथि गरिएको कारवाही पनि निष्क्रिय भएको छ ।
माधव नेपाल पक्ष भने असार १८ गते बोलाइएको केन्द्रीय कमिटीमा सहभागिताको सन्दर्भमा धारणा बनाउन आन्तरिक छलफलमा जुटेको एक नेताले बताए । नेपाल निकट नेता गोकर्ण विष्टले आफूहरू बैठकमा रहेको बताउनुभयो ।
नेपाल पक्षका केही नेता संस्थापन पक्षसँग निरन्तर संवादमा छन् । नेपालसहितका नेताहरुको कारवाही फुकुवा र २०७५ जेठ २ को अवस्थामा फर्किए पार्टी एकता हुने बताइरहेका बेला बुधवारको बैठकले पूर्ववत् कमिटीमा फर्किने निर्णय गरेको छ ।
तर, नेपाल पक्षले भने जस्तो जेठ २ अघिको कमिटी नभई एमालेबाट नेकपा एकताको बेला थपिएका ४१ जना र नेकपा एकतापछि एमालेमा समाहित भएका पूर्व माओवादीका २३ जना केन्द्रीय सदस्यसहितको बैठक बोलाइएकाले नेपाल पक्षले त्यो बैठकमा सहभागिताबारे निर्णय गर्न बाँकी छ ।
दिउँसोको बैठकले केन्द्रीय कमिटि बैठक बोलाउँदै नेपाल पक्षमाथि गरिएको कारवाही समेत निष्क्रिय भएको ठहर गरेको थियो ।
